சிறுநீரக நோயை குணப்படுத்தும் பீன்ஸ்

பார்ப்பதற்கு அழகாக இருப்பதோடு, ருசிக்கவும் பிரமாதமான இந்த டபுள் பீன்ஸ், ஏராளமான சத்துகளை தன்னகத்தே  கொண்டுள்ளது என்கிறார் டயட்டீஷியன் அம்பிகா சேகர். அதிகம் பேர் அறியாத டபுள் பீன்ஸின் ஆரோக்கிய ரகசியங்களைப்  பட்டியலிடுவதுடன், அதை வைத்து மூன்று சுவையான உணவுகளையும் சமைத்துக் காட்டுகிறார் அவர்.

டபுள் பீன்ஸ் இரண்டு வகைப்படும். பெரிய பீன்ஸ் 4X2.5 செ.மீ. அளவிலும் சிறிய பீன்ஸ் 3X2 செ.மீ. அளவிலும் காணப்படும்.  காய்ந்த பீன்ஸ் மற்றும் ஃப்ரெஷ் பீன்ஸ் இரண்டிற்கும் ஒரே மாதிரியான பலன்களே உள்ளது. விதைத்த முதல் மூன்று  மாதங்களில் விளையும் பீன்ஸ் பார்க்க அழகாக சிறுநீரக வடிவில் இருக்கும்Fabaceae குடும்பத்தை சேர்ந்த இந்த வகை பீன்ஸ்  மத்திய அமெரிக்காவில் விளைய ஆரம்பித்து இப்போது நாடெங்கும் குளிர்பிரதேசங்களில்
பயிரிடப்படுகிறது.

சமைக்கும் முறை

டபுள் பீன்ஸ் அதன் புரதச்சத்தின் பயனுக்காக பயன்படுத்தப்படுகிறது. மற்ற பருப்பு வகைகள் போல இது அதிகம் பயன்படுத்தாத  காரணம் இதில் இருக்கும் நார்ச்சத்தின் அளவு அதிகம் என்பதாலும், இதில் உள்ள ஆக்ஸாலிக் அமிலம் சில நேரங்களில் வயிற்று  வலியை உண்டாக்கலாம் என்பதாலும் தான். வாரம் இரண்டு முறை காலை மற்றும் மதிய உணவிற்கு பயன்படுத்தலாம்.  ஆனால், நிறைய தண்ணீர் குடிக்க வேண்டும். அப்போது எளிதில் ஜீரணமாகி விடும். அதே போல் சுண்டல் போல் தனியாக வேக  வைத்து சாப்பிடாமல் ஏதாவது காய்கறி அல்லது மாவுச் சத்துள்ள உணவுடன் சேர்த்து சாப்பிட்டால் அஜீரணக் கோளாறு  இருக்காது. குளிர்காலத்தில் மலிவாக கிடைக்கும். அப்போது வெயிலில் உலர வைத்து பாதுகாத்து வைத்தால் வருடம் முழுவதும்  பயன்படுத்தலாம்.

மருத்துவப் பயன்கள்

பச்சை மற்றும் காய்ந்த பீன்ஸ், ஃபோலேட் (Folate) எனும் உயிர்ச்சத்து நிறைந்தது. 100 கிராமில் 395 மி.கி. அல்லது 99  சதவிகிதம் இருந்து ஒரு நாளைய தேவையை தருகிறது. இந்த சத்து  பி 12 வைட்டமினுடன் சேர்ந்து செல் பிரிவில் டிஎன்ஏ  உருவாக்குவதில் முக்கிய பங்கு வகிக்கிறது. கர்ப்ப காலத்தில் இந்த பருப்பு வகையை உட்கொள்வது குழந்தைக்கு நல்ல பலனை  அளிக்கும்.இது மிக முக்கியமான  பி வைட்டமின்களான (பி1, தையமின்) பி 6 பைரிடாக்ஸின், பான்டதனிக் அமிலம்,  ரிபோஃபிளேவின், நியாசின் போன்ற சத்துகள் நிறைந்தது. இவை அனைத்தும் மாவுச்சத்து, புரதச்சத்து, கொழுப்புச்சத்து   வளர்சிதை மாற்றம் செய்ய பெரிதும் பயன்படுபவை.

இரும்புச்சத்து, பொட்டாசியம், காப்பர், மாங்கனீசு சத்துகளை அதிகம் பெற்றுள்ளது. இவை அனைத்தும் நமது உடலில்  Electrolyte சமநிலையில் முக்கிய பங்கு வகிக்கிறது. எனவே சர்க்கரை மற்றும் இதயநோய் உள்ளவர்கள் அவசியம் வாரம் 2  முறை உணவில் சேர்த்துக் கொள்ள வேண்டும். இதில் பொட்டாசியத்தின் அளவு அதிகமாக உள்ளதால் சிறுநீரக நோய்  உள்ளவர்கள் தவிர்க்க வேண்டும். இதிலுள்ள மாங்கனீசு சத்து ஆன்ட்டிஆக்சிடன்ட் உற்பத்தியில் மிக முக்கிய பங்கு வகிக்கிறது.

 தேர்வு செய்வது

ஃப்ரெஷ்ஷான டபுள் பீன்ஸ், பச்சை பசேலென்ற நிறத்திலும், பளபளவென்றும் இருக்கும். மேலே சுருக்கங்களோ, மஞ்சள் நிறத்  திட்டுகளோ காணப்படாது.உலர்ந்த டபுள் பீன்ஸை, ஈரமில்லாத டப்பாவில், காற்று புகாதபடி போட்டு வைத்து, 6 மாதங்கள் வரை  வைத்திருந்து உபயோகிக்கலாம்.

என்ன இருக்கிறது

புரதம்                 -     8.3 கிராம்
கொழுப்பு      -   0.3 கிராம்
நார்ச்சத்து     -    4.3 கிராம்
கார்போ
ஹைட்ரேட்          -   12.3 கிராம்
ஆற்றல்                   -  8 கிலோ கலோரிகள்
கால்சியம்             -  40 மி.கி.
பாஸ்பரஸ்           -  140 மி.கி.
இரும்புச்சத்து  -   2.3 கிராம்
மெக்னீசியம்           -   25 மி.கி.

டபுள் பீன்ஸ் புலாவ்

தேவையானவை :

சம்பா கோதுமை ரவை - 1 கப், டபுள் பீன்ஸ் - 100 கிராம், வெங்காயம் - 2, தக்காளி - 1, பச்சைமிளகாய் - 2, பட்டை, லவங்கம்,  ஏலக்காய் - தலா 1, தயிர் - 1 டேபிள்ஸ்பூன், மிளகாய் தூள் - 1 டீஸ்பூன், மல்லி, புதினா - 10 கிராம், இஞ்சி-பூண்டு விழுது - 2 டீஸ்பூன், உப்பு, எண்ணெய்-தேவைக்கு.

செய்முறை :

முதலில் கோதுமை ரவையை வறுத்துக் கொள்ளவும். பிறகு குக்கரில் எண்ணெய் ஊற்றி பட்டை, லவங்கம் தாளித்து  வெங்காயம், தக்காளி, மிளகாய்தூள், பச்சை மிளகாய், ஏலக்காய், தயிர், மல்லி, உப்பு, புதினா, இஞ்சி-பூண்டு விழுது  அனைத்தையும் ஒன்றன் பின் ஒன்றாக சேர்த்து டபுள் பீன்ஸ், ரவை சேர்த்து ஒன்றுக்கு 2 கப் தண்ணீர் சேர்த்து குறைந்த தீயில்  10 நிமிடம் வேக வைத்து பரிமாறவும்.

பீன்ஸ் சாலட்

தேவையானவை :

வெள்ளரிக்காய் - 1, தக்காளி - 1, முட்டைகோஸ் - 50 கிராம், டபுள் பீன்ஸ் - 100 கிராம், கேரட் - 50 கிராம், எலுமிச்சைச்சாறு - 1 டீஸ்பூன், மிளகுத்தூள் - ½ டீஸ்பூன், உப்பு - தேவையான அளவு, மாதுளை முத்துகள் - 50 கிராம், ஆலிவ்  எண்ணெய் - 1 டீஸ்பூன்.

செய்முறை :

டபுள் பீன்ஸை உப்பு சேர்த்து வேக வைக்கவும். அனைத்து காய்கறிகளையும் பொடியாக நறுக்கி உப்பு, மிளகுத்தூள், மாதுளை  முத்து, ஆலிவ் எண்ணெய், எலுமிச்சைச்சாறு சேர்த்து கலந்து பரிமாறவும்.

பீன்ஸ் சோயா மசாலா

தேவையானவை :

டபுள் பீன்ஸ் - 100 கிராம், சோயா சங்க்ஸ் - 100 கிராம், குடைமிளகாய் - 100 கிராம், வெங்காயம் - 100 கிராம், தக்காளி - 100  கிராம், பூண்டு - 5 பற்கள் (பொடியாக நறுக்கியது), இஞ்சி - 10 கிராம் (சிறியதாக நறுக்கவும்), மிளகாய் தூள் - 1 டீஸ்பூன்,  தனியா தூள் - 2 டீஸ்பூன், கரம் மசாலா - ½ டீஸ்பூன், மஞ்சள்தூள் - ¼ டீஸ்பூன், உப்பு - தேவையான அளவு, எண்ணெய் - 2  டீஸ்பூன்.

செய்முறை :

டபுள் பீன்ஸை தனியாக உப்பு சேர்த்து வேக வைத்துக் கொள்ளவும். சோயா சங்க்ஸையும் அதே போல் கொதிக்கும் தண்ணீரில்  போட்டு வேக வைத்து தண்ணீரை வடிகட்டி வைத்துக் கொள்ளவும். பின் உருளைக்கிழங்கு வறுப்பது போல் எண்ணெயில் பூண்டு,  இஞ்சி, வெங்காயம், தக்காளி, மசாலா, உப்பு மற்றும் குடைமிளகாய் சேர்த்து நன்கு வதங்கியதும் டபுள் பீன்ஸ் மற்றும் சோயா சங்க்ைஸ சேர்த்து வறுத்து பரிமாறவும்.